| ՀՀ, Երևան, 0014 | +374 10 20 30 91 |
| Պ.Սևակի 5/7 | +374 10 20 30 92 |
| +374 10 54 45 17 |
Սեփական առողջության վերահսկում. վահանաձև գեղձի պլանային ՈւՁՀ
2016-10-11
Վահանաձև գեղձի ուլտրաձայնային հետազոտությունը (ՈւՁՀ) իրենից ներկայացնում է մասնագիտացված բժշկական գործողություն, որի ժամանակ վահանաձև գեղձի հյուսվածքում կարող են հայտնաբերվել բազմաբնույթ ախտաբանական գործընթացներ: Հարկ է նշել, որ այն մարդու օրգանիզմի կարևորագույն օրգաններից է: Վահանաձև գեղձի հիվանդությունների զարգացման պատճառ կարող են լինել բնածին արատները, թունավորումները, յոդի ցածր պարունակությամբ տարածաշրջաններում ապրելը:
Վահանաձև գեղձը ներզատական համակարգի օրգաններից մեկն է, արտադրում է կենսական կարևոր նշանակություն ունեցող եռյոդթիրոնին և թիրոքսին հորմոնները, որոնք կարգավորում են կենտրոնական նյարդային համակարգիի, սրտի և անոթների աշխատանքը, աղեստամոքսային ուղու, սեռական օրգանների գործունեությունը:
Հետևյալ ախտանիշները վկայում են այն մասին, որ անհրաժեշտ է ՈւՁՀ իրականացնել.
- կարճ ժամանակահատվածում քաշի կտրուկ անկում կամ` ավելացում, ախորժակի ուժեղացում կամ` լիովին բացակայություն,
- սուբֆեբրիլ ջերմություն, ծանրաբեռնվածության ժամանակ առատ քրտնարտադրություն,
- կոկորդում օտար մարմնի կամ գնդի առկայության զգացողություն, շնչահեղձության նոպաներ,
- մազերի և եղունգների չորություն, մաշկի թեփոտում,
- տրամադրության անկումներ, տագնապային վիճակներ, հաճախացած սրտխփոց:
Եթե առկա է վերը նշված ախտանիշներից գոնե մեկը, ապա հարկ է այցելել ներզատաբանի՝ վահանաձև գեղձի ուլտրաձայնային հետազոտություն իրականացնելու և օրգանիզմում որոշակի հորմոնների մակարդակը որոշելու համար:
Ինչու՞ է անհրաժեշտ իրականացնել ՈւՁՀ
Վահանաձև գեղձի ՈւՁՀ-ն օգնում է օպերատիվ կերպով վաղ շրջանում հայտնաբերել օրգանի ախտաբանությունները մինչև խպիպի զարգանալը: Ճիշտ իրականացված ախտորոշումը և ստացված արդյունքների համապատասխան մեկնաբանումն օգնում են հիվանդի համար ընտրել բուժման լավագույն համալիր՝ հիվանդության զարգացման կանխարգելման և առողջական վիճակի կայունացման նպատակով:
Վահանաձև գեղձի ֆունկցիայի խանգարումներն առաջ են բերում հետևյալ հիվանդությունները.
- Հիպերթիրեոզ: Պայմանավորված է օրգանի ներզատական ֆունկցիայի չափազանց ակտիվ աշխատանքով: Այն բերում է ներքին օրգաննների աշխատանքի լուրջ խանգարումների և օրգանիզմում տեղի ունեցող հիմնական նյութափոխանակության գործընթացների խանգարումների:
- Հիպոթիրեոզ: Վահանաձև գեղձի դիսֆունկցիա է, որը բերում է նյութափոխանակության դանդաղեցման և հիմնական հորմոնների անբավարարության:
- Թիրեոտոքսիկոզ: Ախտաբանություն, որը մարդու մոտ բերում է թունավոր խպիպի առաջացման:
- Վահանաձև գեղձի բորբոքում՝ թիրեոիդիտ:
Ընդհանրապես, դասակարգումն ընդգրկում է վահանաձև գեղձի բազմաթիվ հիվանդություններ: Փաստ է այն, որ դրանք բավականին վտանգավոր են առողջության և նորմալ կյանքի համար: Հիվանդը կարող է տառապել հանգուցավոր խպիպով կամ վահանաձև գեղձի տարածուն մեծացմամբ, սակայն վատ ինքնազգացողությունը պայմանավորվում է ճնշման բարձրացմամբ, մրսածությամբ կամ շատակերությամբ` քողարկելով լուրջ ախտաբանությունները, որոնք էլ վաղ շրջանում կարելի է հայտնաբերել վահանաձև գեղձի ՈւՁՀ միջոցով:
Ինչպե՞ս է իրականացվում հետազոտությունը
Հետազոտությունն իրականացվում է հատուկ սենյակում: Հիվանդը պառկում է մեջքի վրա, պարանոցի տակ բարձ է դրվում, որն օգնում է անշարժացնել գլուխը: Ապա մասնագետը պարանոցի շրջանում քսում է հատուկ բաղադրությամբ նյութ, որը հնարավորություն է տալիս լավացնել վահանաձև գեղձից դուրս եկող ուլտրաձայնային ազդանշանը: Ուլտրաձայնային հետազոտության ժամանակ մոնիտորին տեսանելի է օրգանի երկչափ պատկերը: Հետազոտության արդյունքները բժշկի կողմից վերլուծվում, ախտորոշում, ուրվագծվում է հիվանդության պատկերը:
Ներզատաբանները խորհուրդ են տալիս վահանաձև գեղձի ՈւՁՀ անցնել յուրաքանչյուր օրացույցային տարվա ընթացքում առնվազն մեկ անգամ, քանի որ այս հետազոտությունն օգնում է ապագայում խուսափել առողջական լուրջ խնդիրներից: Եթե խոսենք վնասակար ազդեցությունից, հարկ է նշել, որ ՈւՁՀ իրականացնելու դեպքում այն բացակայում է: Սա անցավ, կարճատև գործողություն է, որը հնարավորություն է տալիս ամբողջական պատկերացում կազմել վահանաձև գեղձի վիճակի մասին: Այն ցուցված է ինչպես մեծահասակներին, այնպես էլ` երեխաներին: